Heart Touching urdu poetry by Hadia Khan Hadia :

۔۔۔۔۔۔ غزل نمبر ایک ۔۔۔۔۔۔۔

خاک میں خاک  ملی  ہو   جیسے

دھول چہرے پہ جمی ہو  جیسے

لب پہ مسکان  ہے  ٹھہری  ٹھہری

آنکھ میں  میرے نمی  ہو  جیسے

دل کے ارماں سے دھواں اٹھتا ہے 

روٹی چولھے پہ  جلی  ہو  جیسے

دل کا   آنگن  ہوا  روشن   روشن

 سامنے  تیری   گلی  ہو    جیسے

رات  آنکھوں  میں  دمکتا  منظر

یاد  کی کھڑکی  کھلی ہو جیسے

عشق کے  کوچے  میں دل خالی ہے

کوئی    تنہائی   بھری  ہو   جیسے

دور افق  پر  ہے  اداسی سی کوئی

ہجر   کی  شام   ڈھلی   ہو  جیسے

اسماہادیہ۔۔۔۔۔۔۔

....... غزل نمبر دو ........ 

تنہا کسی  کی  یاد  میں  جلتا  رہا   چراغ

 کیا جانے  کیا  ہواؤں  سے  کہتا  رہا  چراغ 

الجھا رہا خود  اپنی  ہی  لو  سے  تمام  رات 

 اک داستاں اندھیرے  کی  لکھتا  رہا  چراغ 

جتنے بھی شب پسند تھے عاری تھے نیند سے

 لوری محبتوں  کی     سناتا   رہا   چراغ 

سرکش  ہوا  کے  سامنے  تن   کر   کھڑا   رہا 

بجھ  بجھ  کے  تیرگی  کو  مٹاتا  رہا  چراغ

بام ہنر پہ  شان   سے   روشن   ہے   آج   بھی 

درس   وفا   ہواؤں    کو   دیتا   رہا    چراغ 

شب بھر خیال یار کی اک روشنی کے ساتھ

 آنگن  میں  چاند  بن  کے  چمکتا  رہا  چراغ 

اسماہادیہ