New Amazing Urdu poetry by Shahid Zaki :

GHAZAL NO 1 :

سانس   ہو   یا  سال   میرا   وقت   سارا    آپ  کا

میری   پیشانی  میں  روشن   ہے  ستارہ    آپ   کا

آگ   زندہ  رہ    نہیں   سکتی   اگر   ایندھن  نہ ہو

یعنی   ناممکن   ہے   میرے    بن   گزارا     آپ   کا

گوشت  دریا  برد     کرنے    کی    روایت  یاد   کی

اور   ہم  نے   ڈوب   کر    صدقہ    اتارا    آپ     کا

بھاگ کر  بھی اس تعلق  سے  کہاں  بھاگیں گے ہم

اب اسی  دلدل  میں   ہے   رستہ    ہمارا     آپ   کا

ترک_ دنیا   پر  بھی کچھ  اس طرح   دنیا دار ہوں

آپ   دنیا      کا     سہارا     میں   سہارا     آپ   کا

آپ  کہتے  ہیں  کہ یہ  تشکیک   ہے  تو    ٹھیک  ہے

ہاں    مجھے      گرداب     لگتا   ہے  کنارہ  آپ   کا

کاٸنات   اس     روز  بالکل    آپ   جیسی   ہو   گٸ 

میں نے  پس  منظر  سے   کیا  منظر   ابھارا  آپ کا

زندگی   شاہد   مگر    اک    بار  بس   اک  بار   تھی

ہاں   میں   ہونا    چاہتا    تو  تھا   دوبارہ   آپ   کا

شاہد ذکی

GHAZAL No 2 :

رنگ اپنے اپنے وقت پہ  کھلتے  ہیں آنکھ پر 

اول   فریب   ہے   کوئی   ثانی  فریب  ہے

سودا گرانِ شعلگیِ  شر   کے   دوش    پر 

مشکیزگاں  سے   جھانکتا  پانی   فریب  ہے

اس گھومتی زمیں پہ   دوبارہ ملیں گے ہم

ہجرت  فرار نقل مکانی فریب ہے

دریا کی اصل تیرتی  لاشوں سے  پوچھیے 

ٹھہراؤ  ایک   چال   روانی   فریب    ہے

اب شام ہو گئی   ہے  تو   سورج  کو  روئیے

ہم نے    کہا نہ   تھا   کہ  جوانی   فریب ہے

بارِ دگر    سمے  سے  کسی     کا   گزر نہیں 

آئندگاں    کے  حق   میں  نشانی   فریب  ہے

علم اک حجاب   اور   حواس   آئینے کا زنگ

نسیان     حق    ہے    یاد  دہانی   فریب   ہے

تجسیم کر  کہ  خواب  کی  دنیا ہے  جاوداں 

تسلیم     کر    کہ     عالمِ فانی  فریب   ہے

شاہد      دروغ   گوئیِ  گلزار      پر  نہ   جا 

تتلی   سے    پوچھ   رنگ  فشانی   فریب  ہے

شاہد ذکی

GHAZAL NO 3 :

نہیں   کہ   سؤے   مسیحا   قدم  نہیں  اٹھتا 

قدم    اٹھاؤں   تو   کہسار _ غم  نہیں  اٹھتا 

محال  تو نہیں    ہے  جال   اڑا   کے  لے  جانا 

مگر   یہ    غول _ منافق     بہم   نہیں  اٹھتا 

یہ  عشق   منظر۔ یکسانیت     سے   مر   جاتا

اگر   وہ   پردہء  قول و قسم      نہیں   اٹھتا 

وہ آگ اتنی حسیں تھی کہ میں بجھا نہ سکا 

میں مانتا ہوں   دھواں  ایک دم  نہیں   اٹھتا 

سنو   یہ    تیغ   اٹھانا     ہمارا     کام    نہیں 

یہ وه  اٹھاتے ہیں جن    سے  قلم  نہیں اٹھتا 

سفال   سلسلہء  نور   سے جڑی    ہوئی    ہے 

خدا      بغیر    خمیر _ صنم     نہیں     اٹھتا 

میں    بے کنار    چھلکتا      نظر      نہیں  آتا 

وگرنہ مجھ  میں  بھی طوفان کم نہیں اٹھتا 

ہم   اپنی  اپنی  حد _ ظرف  میں  اگر  رهتے 

 کبهی بهی مسءلہء  بیش و کم   نہیں اٹھتا 

وہ برگ _ گل   ہو , ہوا ہو   کہ  آنکھ ہو شاہد 

زیادہ   دیر   کسی   سے   بھی نم نہیں اٹھتا 

شاہد ذکی 

 GHAZAL No 4 :

مقام- ترک   سے  خواہش  تلک  بھی  جاتا  ہے 

خیال  ہی   تو  ہے  آخر  بھٹک  بھی  جاتا  ہے

عجیب     ہوتے    ہیں    اسرار - چہرہء  سادہ 

کبھی  کبھی   مرا   آئنہ  تھک  بھی  جاتا  ہے

اگر ہے پیاس پرائ  تو   پاؤں  دشت میں رکھ 

وگرنہ  راستہ   دریاؤں   تک   بھی   جاتا   ہے

مرے   قریں   سے  گزرتا   ہوا   خیال - دوست 

کبھی کبھی مرے  شانے   جھٹک بھی جاتا ہے

غبار  ہو  کے   بدن    دو   محبّتوں    کے   بیچ 

زمیں کی  سمت بھی سوے فلک بھی جاتا ہے

یہ    کار - گریہ   تو  بنجر  بنا  رہا  ہے   مجھے 

نمی بھی جاتی ہے مجھ سے نمک بھی جاتا ہے

مرا  ہوا  ہے   کہ  شب  سے    ڈرا  ہوا     شاہد 

یقیں بھی  شمس پہ آتا ہے  شک بھی  جاتا ہے

شاہد ذکی